Мектепте ұялы телефонға тыйым салынуы мүмкін

Мектепте ұялы телефон пайдалануға тыйым салынуы мүмкін. Сабақ барысында смартфонды ұстауға болмайтыны заңмен бекітілген. Енді үзіліс кезінде де оқушыларды ұялы телефоннан шектеу мәселесі қарастырылып жатыр. Осы мақсатта заңға орта білім беру ұйымдарында ұялы құрылғыларды пайдалану бойынша бірыңғай қағидаларды бекіту ұсынылды. Бұл әлі де талқыланады деді депутат Асхат Аймағамбетов.

Асхат Аймағамбетов, Мәжіліс депутаты:

Баладан ұялы телефонын алғаннан кейін, жауапкершілік туындайды. Біз осыны ұмытпауымыз керек. Мысалы барлық мектептерде ұялы телефондарды қоятын арнайы шкаф жоқ. Ол жерлерге бейнебақылау камераларын орнату керек. Сондықтан дайындыққа қатысты мәселе бар. Талқылау керек, тиімді шешім қабылдау қажет. Бірден ұялы телефонды жинап аламыз деген болмайды.