Түркияда кеншілер полициямен қақтығысты

Түркияның Анкара қаласында шеруге шыққан кеншілер полициямен қақтығысты.

Бірнеше айдан бері жалақы алмаған 110 шахтер қала орталығында бір аптадан бері ереуілдетіп тұрған еді. Талабы орындалмаған жұмысшылар Энергетика министрлігі ғимаратына қарай жүрмек болғанда олардың жолын полиция бөгеп, арты қақтығысқа ұласты. Ереуілшілер мен полиция жасақтары арасында жарақат алғандар бар.

Оқиғадан кейін жекеменшік көмір өндіру компаниясында жұмыс істейтін кеншілердің мәселесіне мемлекет араласты. Бірнеше айдан бері төленбеген жалақы бүгін толық өтелетін болды. Жұмысшылардың айлығын уақытылы төлемей, жағдайды ушықтырған компанияға ірі көлемде айыппұл салынды.

Гөкай Чакыр, тәуелсіз кеншілер кәсіподағы ұйымының басшысы:

Бүгін екі министрліктен хабарласып, айлық төленетінін айтты. Бірақ әзірге кеншілердің есепшотына ақша түскен жоқ. Ақша түскенге дейін ереуілді тоқтатпаймыз. Алайда келіссөздерге әрдайым дайынбыз. Негізгі мақсатымыз – шу шығару емес, тиісті еңбекақымызды алу.