Израиль президенті Қазақстанға ресми сапармен келді

Израиль Президенті Ицхак Герцог Қазақстанға ресми сапармен келді. Ақордада салтанатты қарсы алу рәсімі өтті. Президенттер бір біріне делегация мүшелерін таныстырып, екі елдің әнұрандары орындалғаннан кейін шағын құрамдағы келіссөздер басталды. Қос ел арасындағы дипломатиялық диалог 1992 жылы басталған. 30 жылдан асқан әріптестікті экономикалық қана емес саяси бағытта да тиімді пайдалану маңызды екенін айтты Қасым-Жомарт Тоқаев. Израиль президенті Қазақстанның Ибраһим келісімдеріне қосылу және Бейбітшілік кеңесінің жұмысына атсалысу туралы шешімін қолдайтынын жеткізді.
Қасым-Жомарт Тоқаев, Қазақстан Республикасының Президенті:

Еліміз Ибраһим келісімдеріне қосылу туралы шешім қабылдады. Бұл қадам Таяу Шығыс елдері мен Израиль арасындағы қарым-қатынастың қалпына келуіне Қазақстанның да үлес қосуға дайын екенін көрсетеді. Бүгін біз өзара экономикалық байланыстарымызға қатысты көптеген мәселені талқылаймыз. Өйткені екіжақты ынтымақтастықтың әлеуеті зор. Бұл мүмкіндікті мейлінше пайдалану керек.

Қазақстанға үнемі келгім келетін еді. Мұны шын жүректен айтып отырмын. Өйткені қазақ жерінің көркем табиғаты мен қазақ халқының керемет мәдениеті туралы көп естідім. Менімен бірге өзара серіктестігімізге, әсіресе, жоғары технологиялар саласындағы ықпалдастыққа тың серпін беретін сарапшылар келді. Әлем жаңа дәуірге қадам басқан кезеңде елдеріміз арасындағы ынтымақтастықтың әлеуеті орасан зор.