Президент Креативті индустрияны дамыту қорының кеңсесін аралап көрді

Президент Креативті индустрияны дамыту қорының кеңсесін аралап, қордың жұмысымен танысты. Бұл Мемлекет басшысының тапсырмасына сай, отандық креативті секторды қолдаудың негізгі институты ретінде құрылған. Қасым-Жомарт Тоқаевқа жаңа кеңістіктің шығармашыл жастар, инвесторлар мен туристер бас қосатын орынға айналатыны жөнінде баяндалды. Шоурум форматында безендірілген кеңседе креативті өнім әзірлеудің толық циклі көрсетілген. Президент зергерлік және ағаш шеберханаларын, музыка, кілем тоқу, бейнелеу өнері залдарын, fashion-аймақты аралады. Ал Yurt Capsule – мұндағы негізгі орынның бірі. Бұл кеңістікте киіз үйдің дәстүрлі формасы технологиялық тұрғыдан жаңа кейіпке енген. Мемлекет басшысына еліміздің брендін қалыптастыру тұжырымдамасы жайында мәлімет берілді.

Айта кетейік, бүгінде Қазақстанның креативті экономика саласында шамамен 48 мың кәсіпкерлік нысан бар. Олар 160 мыңға жуық адамды жұмыспен қамтып отыр. Индустрияға кино, анимация, цифрлық өнер, сән, дизайн және халықтық қолөнер секілді салалар зор үлес қосып жатыр.