Еңбек құқықтарының сақталуын қадағалау күшейтілді

Елімізде еңбек құқығының бұзылуына қатысты тіркелген деректер саны артқан. Бұл туралы Еңбек инспекциясы комитетінің төрағасы Мейрамбек Ахметов мәлімдеді. Оның айтуынша, өткен жылы 17 мыңға жуық шағым қаралған. Сонымен қатар 1700-ден астам жоспардан тыс тексеру жүргізіліп, нәтижесінде 2 мыңнан астам құқықбұзушылық анықталған. Заң талаптарын бұзғандарға жалпы сомасы 136 миллион теңге айыппұл салынды. Мамандардың айтуынша, осы шаралардың нәтижесінде 17 500 қызметкердің құқығы қорғалған. Алайда тіркелген деректердің көбеюі еңбек саласындағы заңсыздықтардың жаппай белең алғанын білдірмейді. Керісінше, бұл – бақылау мен тексеру жұмыстарының күшейтілгенінің нәтижесі.  

Біз еңбек ұжымдарын алты негізгі бағыт бойынша тексереміз. Ең алдымен, ұжымдық келісімшарттардың жасалып, цифрлық базаға енгізілуін қадағалаймыз. Қазіргі таңда инспекторлар профилактикалық бақылау жұмыстарын күшейтті. Маңызды бағыттардың бірі – қызметкерлерді өндірістегі жазатайым оқиғалардан сақтандыру. Сонымен қатар еңбек келісімшарттарының заң талаптарына сай рәсімделуіне ерекше назар аударылады.