Орталық Азиядағы эко-волонтерлікті дамыту жөніндегі резолюция қабылданды

Өңірлік экологиялық саммит аясында «Волонтерлік және экологиялық іс-қимылдар» атты панельдік сессия өтті. Жиынға Орталық Азия елдері мен Әзербайжаннан келген 100-ден аса ерікті мен азаматтық қоғам лидерлері қатысты. Талқы өзегі – экологиялық мәселелерді шешудегі волонтерлік істің рөлі. Сессия жұмысына қатысқан Премьер-Министрдің орынбасары - Мәдениет және ақпарат министрі Аида Балаева Мемлекет басшысының үндеуін оқып берді. Президент бастамасымен елімізде экологиялық еріктілер қозғалысы қарқынды дамып келеді. Қазір бұл салаға 100 мыңнан аса азамат тартылған. Кейінгі бір жылда мыңнан аса іс-шара өткізіліп, 10 мың тонна қоқыс жиналды. Сондай-ақ, 2 миллионға жуық ағаш отырғызылды. Ал Арал теңізінің құрғаған табанында кейінгі бес жылда 1 миллион гектар жерге сексеуіл егілген. Сессия қорытындысы бойынша Орталық Азиядағы экологиялық волонтерлікті дамыту жөніндегі резолюция қабылданып, оны БҰҰ-на жолдау жоспарланып отыр. Сонымен қатар, Каспий теңізі мен Арал өңіріне қатысты бірлескен экожобаларды іске асыру туралы келісімдерге қол қойылды.