Қостанай облысында да АЭС салынуы мүмкін

Елімізде 3 емес, 4 атом электр стансасы салынуы мүмкін. Бұл туралы бүгін атом энергетикасы жөніндегі агенттік төрағасы Алмасадам Сәтқалиев мәлімдеді. Сондай-ақ, ол елімізде салынатын екінші атом электр стансасына Мойынқұм атауы берілгенін айтты. Ол да Балқашта орналаспақ. Қазіргі уақытта 3 перспективалы алаң зерттеліп жатыр. АЭС құрылысы үшін тағы бір лайықты орын ретінде Батыс Қазақстан аймағы да таңдалып отырғанын жеткізді.
Алмасадам Сәтқалиев, ҚР Атом энергиясы жөніндегі агенттігінің төрағасы:

Қазақстанда басқа да алаңдар бар. Қазіргі уақытта оларды зерттеп жатырмыз. Энергия балансына байланысты мүмкін енді 20-30 жылдан кейін Қостанай алаңы қарастырылуы мүмкін. Ол жер де Қазақстандағы атом стансасы құрылысы үшін болашағы бар орын бола алады.