«AMANAT» партиясы жаңа жоба бастады

Ауыл әкімдері, мәслихат депутаттары мен партия өкілдері арнайы даярлықтан өтеді. «AMANAT» партиясы қолға алған жаңа жоба аясында олар ұжымды тиімді басқару, стратегиялық ойлау дағдыларын күшейтеді. Сондай-ақ бағдарлама шеңберінде партияның кадрлық резерві құрылып, мемлекеттік және қоғамдық-саяси қызметте бәсекеге қабілетті көшбасшылар іріктеледі. Жаңа жобаны таныстыруға арналған жиын өтті. Оған мемлекеттік органдар мен академиялық қауымдастық өкілдері, сондай-ақ партияның өңірлік филиалдарының қызметкерлері қатысты.

Ерлан Қошанов, ҚР Парламенті Мәжілісінің төрағасы, «AMANAT» партиясының төрағасы:

Мемлекет басшысы «Алған дипломың өмір бойы азық болады» деген түсініктің ескіргенін, оның орын «Өмір бойы оқы және үйрен» деген қағида басқанын үнемі айтып жүр. Оның үстіне, жаңа Конституцияда адами капиталды дамыту, білім мен ғылым стратегиялық басымдық ретінде бекітілді. Сондықтан осы бағдарды басшылыққа алған «AMANAT» партиясы бүгін жергілікті кадрларды оқыту бағдарламасын бастап отыр.