«ҚазТемірТранс» АҚ-ның бұрынғы вице-президентіне іздеу жарияланды

Қаржылық мониторинг агенттігі «ҚазТемірТранс» акционерлік қоғамының бұрынғы вице-президенті Азамат Капеновке қатысты сотқа дейінгі тергеп-тексеруді бастады. Ол қызметтік өкілеттігін асыра пайдаланды және аса ірі көлемде қаражат жымқырды деген күдікке ілінген. Соның салдарынан ұлттық компанияға 5,2 миллиард теңгеден астам шығын келген. Қазір Капеновке халықаралық іздеу жарияланды. Соттың санкциясымен оған қатысты қамауда ұстау түріндегі бұлтартпау шарасы сырттай тағайындалды.

Келтірілген залалды өтеу және заңсыз алынған активтерді қайтару мақсатында Бас көлік прокуратурасы «Достық» станциясындағы терминалды сотқа дейін тәркілеу туралы өтініш жолдаған. Астана қаласының қылмыстық істер жөніндегі ауданаралық сотының қаулысымен аталған мүлік мемлекет кірісіне өткізілді. Қазіргі таңда тергеу жалғасуда. Қазақстан Республикасының Қылмыстық-процестік кодексіне сәйкес өзге ақпарат жария етілмейді.