Жасыл энергия – үш елдің ортақ стратегиясы

Қазақстан, Әзербайжан және Өзбекстан. Аталған үш ел бірігіп, енді жел мен күннен алынатын таза энергияны дамытады. Тіпті оны Еуропаға дейін экспорттауға мүмкіндік бар. Бүгін Сенатта «жасыл энергия» туралы заң мақұлданды. Келісім 2024 жылдың қарашасында Бакуде үш ел басшылары қол қойған құжат негізінде жүзеге асып отыр. Басты мақсат — жаңартылатын энергия көздерін дамыту және «таза» электр энергиясын халықаралық нарықтарға шығару. Сарапшылардың пікірінше, бұл келісім Қазақстанның өңірлік энергетикалық хаб ретіндегі рөлін күшейтеді. Қазірдің өзінде елімізде жаңартылатын энергия көздерінің үлесі артып келеді. 160-тан астам нысан жұмыс істеп, «жасыл» энергия өндірісі жыл сайын өсіп келеді.

Қаралған үшжақты келісім елдеріміз арасында жасыл энергетиканы дамыту жолындағы бірлескен жұмысты айқындайды. Оның тиімділігін арттыру үшін тараптар арнайы Басқарушы комитет пен Жұмыс топтарын құруды көздеп отыр. Жалпы, бұл заңды мақұлдау елімізде жаңартылатын энергия саласын дамытуға және осы бағытта өңірлік ынтымақтастықты нығайтуға өз септігін тигізеді деп сенеміз.