Өскеменде тұрғындарға қауіптің алдын алуды дрондар арқылы ескертіп жатыр

Өскемен қаласының тұрғындарына қауіпсіздік шараларын дрондар арқылы ескертіп жатыр. Өйткені күн жылынған бойда көпқабатты үйдегілер терезені ашқанымен қауіпсіздікті ескермейді. Ал оның салдары орны толмас өкінішке әкеп соғады. Сондықтан облыстық Төтенше жағдайлар департаментінің мамандары  дронды көпқабатты үйлердің терезесінің тұсына дейін ұшырып, дауыс зорайтқыш арқылы тұрғындарға қауіптің алдын алуды ескертті.

Аяулым Кекиева, облыстық ТЖД бас маманы:

Былтырғы жылғы мәліметке сәйкес облыс аумағында 9 бала терезеден құлап кету жағдайы тіркелген. Оның ішінде, өкінішке қарай, бір бала қаза тапты. Осыған орай Төтенше жағдайлар департаменті заманауи құралдармен, яғни дронардың көмегімен үгіт-насихат жұмыстарын жүргізуде. Осыған сәйкей ата-аналарға балаларын қараусыз қалдырмауын және терезелердің алдына жиһаздар орнатпауын сұраймыз.