Оралда санитариялық-экологиялық айлығы жарияланды

Оралда 4 сәуірден 30 мамырға дейін санитариялық-экологиялық айлығы жарияланды. Қалада қазірдің өзінде тазалық жұмысы басталып кетті. Бірнеше сенбілік ұйымдастырылып, көшелер мен қоғамдық орындар, аялдама мен арықтар көң-қоқыс, шаң-тозаңнан арылды. Айлық аясында рұқсат етілмеген қоқыс орындары мен стихиялық қоқыс үйінділері, демалыс орындары мен гараж кооперативтері аумағы кезең-кезеңімен тазартылып, бақылауға алынады. Екі жыл бұрынғы алапат су тасқынынан кейін бос қалған саяжайлардағы иесіз қалған тұрмыстық қалдық, құрылыс материалдарын ретке келтіріледі. Шаһар 20 учаскеге бөлініп, әр аумаққа жауапты мекемелер бекітілген. Сондай-ақ «Таза жағалау» аясында үш өзеннің аумағы тазартылады.