Абай облысында адам саудасымен айналысқан көпбалалы ана 6 жылға сотталды

Семейде «Күміс алқа» иегері, көпбалалы ана адам саудасымен айналысқаны үшін сотталды. Тергеу мәліметінше, ол базарлар мен вокзалдардан әлеуметтік осал топтағы азаматтарды тауып, сеніміне кіріп, кейін оларды шаруа қожалықтарына 100–400 мың теңгеге сатқан. Сотта 5 дерек дәлелденді. Кей жағдайларда жәбірленушілерге қысым көрсетіліп, еркіндігі шектелген.
Айыпталушы кінәсін мойындап, келтірілген шығынды өтеген. Тіпті сотта жәбірленушілер оны кешіріп, қатаң жаза қолданбауды сұраған. Дегенмен жасаған қылмысына қатысты сот оны 6 жылға бас бостандығынан айырды.