Жаңа модульді робот

АҚШ университетіндегі ғалымдар ЖИ көмегімен жасалатын модульді роботты жобалады. Мамандар оны метамашина деп те атап жатыр. Ал Польша оқушыларға мектепте телефон пайдалануға тыйым салмақ. Әлемдегі техно-жаңалықтар жайлы Темірлан Нұржанұлы тарқатсын.

Бұл – жасанды интеллектінің көмегімен жасалған модульді робот. Оны Норсуэстэрн университетінің ғалымдары жобалап шыққан. Құлтемірдің басты ерекшелігі – бір бөлшегін жоғалтса да, іс-әрекетін тоқтатпайды. Ары қарай жүре береді. Бұл технология «метамашина» деп аталады. Оның көмегімен келешекте тез құралатын, жөндеуге оңай роботтарды жасауға жол ашылмақ, дейді мамандар.

Ал Кембридж университетінен шыққан стартап — SuperSharp Space Systems. Мамандар жердің температурасын ғарыштан бақылауға мүмкіндік беретін инфрақызыл спутниктік камера технологиясын әзірлеп жатыр. Жоба аясында планетаның егжей-тегжейлі жылу карталарын жасау көзделіп отыр. Компания бұл шешім арқылы климат мониторингі, ауыл шаруашылығы, теңіз және қауіпсіздік секторлары дәлдігі жоғары термалды бейнелерді ұсынбақ.

1 қыркүйектен бастап Польшада 16 жасқа толаған оқушылар мектеп ішінде ұялы телефонын қолдана алмай қалуы мүмкін. Елде тиісті шешім жоспарланып отыр. Бұл жайлы елдің білім министрі мәлімдеді. Аталған бастама қоғамда түрлі пікір тудырды.