Бет-әлпетті бүркеуге болмайды

Бет-жүзді бүркеп жүруге тыйым салынады. 2 наурыздан бастап қоғамдық орындарда адамның жүзін тануға кедергі келтіретін киім кигендер әкімшілік жауапкершілікке тартылады. Алдымен ескерту беріледі. Бұл әрекет бір жыл ішінде қайталанса, 10 айлық есептік көрсеткіш мөлшерінде айыппұл салынады. Қазіргі уақытта полиция қызметкерлері құқық бұзушылықтың алдын алу мақсатында профилактикалық іс-шараларды белсенді түрде жүргізіп жатыр. Әзірге заң шеңберінен шыққан адам жоқ. Бұл норма қызметтік міндетті орындау кезінде, медициналық қажеттілік туындағанда, ауа райына байланысты немесе бұқаралық іс-шараларға қатысқанда қолданылмайды.

Бұл бетті толығымен жауып тұратын кез келген киім затына қатысты болуы мүмкін. Ол никап, бурка, балаклава немесе дәрігердің жазбасынсыз  медициналық бет-перделер. Мұндай заттар бейнебақылау жүйесінің жұмысына кедергі келтіріп, адамның жеке басын тану, бет-әлпетті анықтау сияқты жүйелердің жұмысын артқа тартып және де қылмысты дер кезінде ашуға мүмкіндік бермейді. Көп жағдайларда қаскөйлер өздерінің бетін тұмшалап алу арқылы ұрлық, тонау, немесе басқа да заңға қайшы әрекеттер жасап жатады.