Атырауда нөсер жауыннан 10 мыңға жуық үй жарықсыз қалды

Атырау қаласында кеше түнде жауынның салдарынан 10 мыңға тарта үй жарықсыз қалды.

Нұрсұлтан Нұрсейіт, тілші:

Жағдай тұрақталып келді, бірақ әлі жарықсыз отырған ықшам аудандар бар. Олар туралы толық ақпаратты жауапты мекеме әлі бермеді. Кеше кешкі 19:00 шамасында Көкарна, Курилкино, Еркінқала, Томарлы ауылы және Авангард 3-4, Ракуш, Жұмыскер, Жұлдыз, Береке ықшам аудандарында электр энергиялары өшіп, 10 мыңға тарта үй жарықсыз қалды.

Қайта қалыпқа келтіру үшін «Атырау Жарық» ЖШС 8 бригада жұмылдырылған. Қосалқы станцияларда апатты жағдай жауынның салдарынан пайда болды дейді атқамінерлер. Қызметкерлер қазір жарықты тұрғын жайларға біртіндеп беріп жатыр. Сондай-ақ қалада 14 вакум техникасы таңға дейін дамылсыз жұмыс істеді. Олар орташық көшелер, арықтар мен әлеуметтік нысандардың аумағынан 350 текше метр су шығарған.