Түркістан облысында тасбақа мен кесірткелерді жаппай көшіріп жатыр

Түркістан облысының Отырар ауданында дала тасбақалары мен бауырымен жорғалаушыларды жаппай көшіріп жатыр.

Аудан аумағындағы игерілмеген жайылымдық жерлер шетелдік компанияға мақта егуге берілгендіктен, қазір көктемгі дала жұмыстарына дайындық жүргізілуде. Осыны ескерген табиғат жанашылары қазір сол жерде тіршілік ететін тасбақа мен кесіртке, жыландарды басқа аумаққа көшіріп жатыр. «Тасбақа» табиғатты қорғау қоры мен «Сырдария-Түркістан» өңірлік паркінің мамандары және еріктілер жұмылдырылған. Оларға мақта компаниясы қолдау көрсетіп, 10 жұмысшысы мен 4 техникасын бөлген. Нәтижесінде бүгінгі күнге дейін 3 мыңнан аса тасбақа мен 10 шақты кесіртке, 5 жылан қауіпсіз аймаққа жеткізілді. Десе де табиғат жанашырлары адам саны аз болғандықтан, көмекке жастар мен еріктілерді шақыруда. Себебі мамыр айында тасбақалар ұйқыға кетпей тұрып, оларды көшіріп үлгеру керектігін айтады.