Жамбылдық әжелер балабақша бүлдіршіндеріне ертегі оқып жүр

Әулиеата өңірінің әжелері әз-Наурыздың қарсаңында балабақша аралап, балаларға ертегі оқып жүр. Ұлттық киім киген ақ жаулықты қарияларымыз ауыз әдебиетіміздегі аңыздарды айтып, бүлдіршіндердің ой-өрісін дамытуға ден қойған.
Ал балақайлардың қабылдауы қиын сөздердің мағынасын жеңіл тілмен түсіндіріп, кей ертегілерді кейіпкер бейнесінде сомдайды. Өйткені шытырман ертегілерге шығармашылық әсер беру арқылы балаларды қызықтырып, қиялына қанат бітіреміз дейді. Әжелер 3 жылдан бері өңірдегі бөбекжайларға аптасына 2 рет барып жүргендерін айтады. Мәселен, былтыр мектепке дейінгі мекемелерде 62 сағат ертегі оқыған.
Жанат Сарыбекова, Тараз қаласының тұрғыны:

Әжелеріміздің ертегі айтуы деген не бұл? Бұл бізден қалып кеткен атам заманнан келе жатқан біздің ата-бабаларымыздың, дәстүріміздің жалғастығын бері қарай жалғастырып келе жатырмыз ғой. Осыны ұмытпай, ертегі айтуға жол тарттық. Кезекке тұрып, әркім өзінің жақын жердегі балабақшаларға барып тұрамыз.