Нормативтік базаны жаңа Конституцияға сәйкестендіру жұмыстары басталды

Нормативтік базаны жаңа Конституцияға сәйкестендіру үшін мемлекеттің институционалдық негізін трансформациялауды кезең-кезеңімен жүзеге асыру тәсілі енгізілуде. Мұны Үкімет отырысында әділет министрі Ерлан Сәрсембаев  айтты. Жаңа тәсілге сәйкес, мемлекеттік жүйе кезең-кезеңімен трансформацияланады. Реформаның негізі — «адамға бағдарланған» модель. Негізгі өзгерістерге тоқталсақ, азаматтардың құқықтарын қорғау күшейеді, «Миранда ережесі» Конституцияда бекітіледі, ұсталған адамға құқықтары бірден түсіндіріледі. Тұрғын үйге қолсұғылмаушылық яғни, сот шешімінсіз үйден шығаруға тыйым салынады. Цифрлық кеңістікте жеке деректерді қорғау және Аумақтық тұтастық пен тәуелсіздікке қатысты жауапкершілік күшейеді.

Жарлықты іске асыру мақсатында депутаттар корпусымен және мемлекеттік органдармен бірлесіп 5 дербес конституциялық заңды әзірлеу басталды. Сондай-ақ 8 конституциялық заңға және 60-тан астам заңға түзетулер енгізу қажет.