Президент отандық өндірістің өсуіне қолайлы жағдай жасауды тапсырды

Қазақстанда тауар айналымы 8,9 пайызға өсіп, 80 триллион теңгеден асты. Бұл туралы Президент қабылдауында болған Сауда және интеграция министрі Арман Шаққалиев айтты. Былтыр электронды сауданың көлемі 3,9 триллион теңгеге жеткен. Елімізде 10 логистика орталығынан тұратын желі қалыптасты. Мемлекет басшысына Еуразиялық экономикалық одақ аясында атқарылып жатқан жұмыстар баяндалды. Ұйым құрылғаннан бері 70 сауда кедергісінің 69-ы жойылды. Келіссөздер нәтижесінде еліміздің бірқатар мәселеге қатысты ұстанымы ескерілді. Президент министрлікке заманауи сауда экожүйесін қалыптастыру, отандық өндірістің өсуіне қолайлы жағдай жасау, тұтынушылардың құқықтарын жан-жақты қорғау жөнінде бірқатар міндет жүктеді.

Жаһандағы экономикалық сын-қатерлерге қарамастан, сыртқы нарыққа шығарылатын шикізаттық емес тауар түрлері мен қызметтер көлемі 41 миллиард долларға жетті. Экспорттаушыларды қаржылай қолдау тетіктері айтарлықтай кеңейді. Атап айтқанда, сақтандыру сомасының максималды мөлшері 1,2 триллион теңгеге дейін көбейіп, қолдау шаралары екі есе өсті.