Шетелде жүрген қазақстандықтар өз таңдауын жасап жатыр

• Шетелде жүрген қазақстандықтар да таңнан бастап таңдауын жасап жатыр. Барлық референдум учаскелері Қазақстанның дипломатиялық өкілдіктерінің аумақтарында орналасқан. Сыртқы істер министрлігінің хабарлауынша, алғаш болып Оңтүстік Корея мен Жапониядағы отандастарымыз дауыс беруге мүмкіндік алды. Сеулде және Токиода сайлау учаскелері жергілікті уақыт бойынша сағат 07.00-де ашылған. Алғашқылардың бірі болып Қазақстан азаматы «Нихон» универститетінің 3 курс студенті Жібек Айдын өз таңдауын жасады.

Жібек Айдын, «Нихон» университетінің студенті:

Бүгін мен жаңа Конституциямызға орай республикалық референдумға қатысуға келдім. Себебі бұл күн, бұл қадам еліміз үшін маңызды күн. Осындай кезде әр азамат шетте қалмай өзінің дауысын беруі керек деп ойлаймын.

Бақытжан Сүйіндіков, Токио қаласындағы №425 учаскелік референдум комиссиясының төрағасы:

Көптеген отандасымыз, әсіресе жастар елшілікке хабарласып, тізімге еніп жатуына қарағанда бүгін дауыс берушілер үлкен белсенділік танытады деп күтеміз.

Сондай-ақ Қытайдың Бейжің, Шанхай, Сиан, Гонконг қалаларында да дауыс беру учаскелері ашылды. Референдумда жалпы шетелде жүрген шамамен 14 мыңнан астам қазақстандық дауыс береді. Дауыс беру 54 елдегі 71 учаскеде өтеді. Таяу Шығыстағы күрделі жағдайға байланысты 10 елдегі 11 учаске жабылған.