Жамбыл облысында алаяқ ерлі-зайыпты сотталды

Жамбыл облысында WhatsApp мессенджері арқылы ыдыс-аяқ сатумен  айналысқан ерлі-зайыптыларға сот үкімі шықты. Олар тұрғындардан 51 млн теңгеден астам сомаға тапсырыс қабылдап, өз міндеттерін орындамаған. Олар кәсіптің бұл түрін 2024 жылдың желтоқсанында бастайды. Әуелі әлеуметтік желі арқылы таныстарына тұрмыстық тауарларды төмен бағада сатамыз деп хабарландыру жіберген. Сөйтіп сенімге кіріп, бастапқыда тұрғындар тапсырысын орындайды. Кейін сұраныс артқанда елдің қаржысын алып, хабарсыз кеткен. Салдарынан 112 адам зардап шекті. Олар отбасылы жұптарға 51 млн 300 мың теңге аударған. Байзақ аудандық соты алаяқтықпен айналысқан күйеуіне 2 жыл 8 айға жаза кесіп, әйелін 2 жыл 4 айға бас бостандығынан айырды.