«Қарағанды-Жезқазған» тасжолының құрылысы келесі айда басталады

«Қарағанды-Жезқазған» тасжолы алдағы 4 жылда толығымен күрделі жөндеуден өтпек. Мемлекет басшысы Ұлттық құрылтайдың V отырысында айтқандай биыл ескі жолдың қапталына екі жолақты жаңа жол салынады. Жұмыс сәуір айының аяғында басталмақ. Құрылыс жұмыстары аяқталғанша, тұрғындар ескі жолмен емін-еркін қатынай алады. Ал кейін ол да толығымен жаңғыртылады. «Қарағанды-Жезқазған» тасжолы 1965 жылы салынған. Содан бері еліміздің оңтүстігі мен солтүстігін қосатын күре жол күрделі жөндеу көрмепті. Жалпы ұзындығы 513 шақырым. Оның 335-і Ұлытау облысының аумағында. Қос өңірді жалғаған күрежол 2029 жылы түйісіп, құрылыс толық аяқталады, деп жоспарлануда.

Дархан Иманашев, «Қазавтожол» Ұлттық компаниясының басқарма төрағасы:

Айдың аяғына дейін конкурстық рәсімдер өтеді. Сәуірден бастап мердігер тағайындалып, жұмыстар басталады. Сәуірдің аяғына дейін толық жұмыс басталады. Жобаның ерекшелігі - мердігер өз тарапынан проект құжаттама дайындап, құрылыспен айналысады. Күтіп ұстау жұмыстарымен 7 жыл айналысады.