Алматыда орташа жылдамдықты есептейтін камералар іске қосылды

Үлкен Алматы айналма автомобиль жолында орташа жылдамдықты есептейтін бейнебақылау камералары іске қосылды. Жаңа жүйе әсіресе жол-көлік оқиғалары жиі болатын жерлерге орнатылған. Облыстық Полиция департаментінің хабарлауынша, соңғы екі жылда мұнда 400-ден аса жол-көлік апаты болыпты. Оның 20-сы қайғылы оқиғамен аяқталған. Осы ретте жаңа жоба жол апаттарының санын азайтпақ. Бұл жолда жеңіл көліктер үшін рұқсат етілген ең жоғары жылдамдық сағатына 120 шақырым. Ал кейбір жүк көліктері мен автобустар үшін жылдамдық шектеуі - 90–110 шақырым аралығында, дейді мамандар.

Шерхан Болатбекұлы, «Үлкен алматы айналма автомобиль жолы» ЖШС заңгері:

66 шақырым бойында төрт түрлі аймақтарға бөліп, төрт түрлі айыппұл мүмкіндігі бар. Бізде барлық жүйе бірыңғай мемелкеттік уақыт өлшемімен бекітілген. Әрбір аркадан кірген уақытпен, шыққан уақыт есептеледі. Және де есептеу жүйелеріне, формулаларына сәйкес екі аркадан арақашықтық есептелген. Осы ара қашықта көліктің жүрген уақытына қарай орташа жылдамдығы есептеледі. Егер орташа жылдамдық заң талаптарынан жоғары болып шықса, айыппұл тағайындалады.