52 мыңнан аса мемқызметкер ЖИ меңгерді

52 мыңнан аса мемлекеттік қызметкер жасанды интеллект бағдарламасын оқып шықты. Бұл былтырғы көрсеткіш. Ал биыл тағы 30 мыңға жуық қызметші ақылды технологияның қыр-сырын меңгермек. Бұл жөнінде Мемлекеттік қызмет істері агенттігінің төрағасы Дархан Жазықбай мәлім етті. Бүгін аталған агенттік 2025 жылы атқарылған жұмысты  қорытындылады. Алқа отырысында мәлім болғандай, Президенттік жастар кадр резервіне қызығушылық артып келеді. Мәселен, жобаға 2019 жылы 13 мың азамат қатысуға ниет білдірсе, 2025 жылы бұл көрсеткіш 32 мыңға жетті. Жалпы, резервке алынған 450 азаматтың 337-сі бүгінде түрлі салаларда еңбек етіп жүр.  Жиын соңында Агенттік төрағасы кадрлық іріктеу жүйесі жаңғыртылғанын, цифрлық экожүйе құрылғанын, жасанды интеллект енгізілгенін және проактивті бақылау моделі қалыптасқанын атап өтті. Алдағы кезеңде мемлекеттік қызметтің тиімді, ашық және нәтижеге бағдарланған моделін одан әрі дамыту жұмыстары жалғасады.