Сербия Қазақстанға балалар тағамын шығару жобасын ұсынды

Сербия Қазақстанмен бірлесіп, жеміс негізіндегі балалар тағамын өндіруді жоспарлап отыр. Жеміс-жидек өсірумен танымал Гроцка қаласының өкілдері қазақстандық кәсіпкерлерге осындай ұсыныс білдірді. Қазақстан – Сербия іскерлік кеңесінің отырысында мамандар бұл бастаманың неге біздің елге бағытталғанын да түсіндірді. Олардың айтуынша, Қазақстанда тыңайтқыш өндірісі жақсы жолға қойылған. Осы мүмкіндікті пайдалана отырып, Гроцка алқаптарында өсірілген жемістерден экологиялық таза әрі сапалы өнім шығаруға болады. Дайын тауарларды Қазақстан нарығына да жеткізу жоспарланған.

Соңғы жылдары екі ел арасындағы сауда жақсы дамып келеді. Бірақ бұл көрсеткішті еселеп өсіруге қауқарымыз бар. Біз ауыл шаруашылығы өнімдері, металл, мұнай химия өнімдері мен тыңайтқыштар сатып отырмыз. Кері бағытта көлік бөлшектері мен дәрі-дәрмек, азық-түлік сатып алып отырмыз. Енді бірлескен жобалардың санын көбейту керек. Қазақстан Үкіметі тарапынан қолдау танытуға дайынбыз.