Алаяқтықтың жаңа түрі: Банк карталарын бұғаттай бастады

Ұлттық банк банк карталарына қатысты алаяқтықтың жаңа түрі пайда болғанын ескертеді. Алаяқтар әуелі банктің байланыс орталығына клиенттің атынан хабарласып, «картамды жоғалттым» деп мәлімдейді. Карта бұғатталғаннан кейін құқық қорғау органдарының қызметкері болып тұрғынның өзіне хабарласады. Сосын «картаны қайта ашып береміз», «ақшаны қауіпсіз шотқа аударуыңыз керек» деген желеумен жеке деректерге қол жеткізеді. Карта кенеттен істен шыққан жағдайда не істеу керек? Банктің call-орталығына хабарласып, оны өзіңіз емес, өзге біреу бұғаттағанын хабарлаңыз. Кеңес алу үшін Ұлттық банктің 1477 нөмірі арқылы хабарласуға болады.