Түркістан облысында алимент төлеушілердің мәселесі талқыланды

Түркістан облысының Келес ауданында алимент төлемегендердің қарызы 167 млн теңгеден асқан. Осыған орай аудан прокуратурасының ұйымдастыруымен «Тәртіпке бастар жол – еңбек» тақырыбында форум өтті. Онда алиментке қарызы барлар мен пробацияда есепте тұрған азаматтарды жұмыспен қамту проблемалары талқыланды. Жұмыс беруші мекемелердің өкілдері шақырылып, арнайы жәрмеңке ұйымдастырылды. «Заң мен тәртіп» қағидаты аясында тұрмысы төмен отбасыларды анықтап, оларға әлеуметтік көмек көрсету жағы қарастырылмақ. Ал алимент төлеуден жалтарған 10 адам әкімшілік жауапқа тартылып, 7 адам қамалды. Айыппұл арқалағандары да бар.

Жантөре Сарыпбек, Келес аудандық прокуратурасының прокуроры:

Прокуратураның бастамасымен бірқатар жұмыстар атқарылып, қазіргі таңда 38 млн теңге қарыз берешегі өндірілді. Алименттің өндірілмеу себебі, ол көп жағдайда жұмыссыздық болып табылады. Сол себепті осы форумда біз бастама ретінде аудан прокуратурасы өткізіп отырмыз. Алдағы уақытта ай сайын осындай жұмыс жәрмеңкелері ұйымдастырылатын болады.