Жаңа Конституция жобасы: Адам мемлекет үшін емес, мемлекет адам үшін

Жаңа Конституция жобасында «Адам мемлекет үшін емес, мемлекет адам үшін» қағидаты айқындала түсті. Үкіметтің кеңейтілген отырысында Қасым-Жомарт Тоқаев осылай деді. Құжатқа енген нормалар Қазақстанның саяси жүйесінің даму қисыны мен бірізділігін бекітеді. Ол ең алдымен «Күшті Президент – ықпалды Парламент – есеп беретін Үкімет» тұжырымдамасына негізделген. Ата Заңымызға қатысты түпкілікті шешім жалпыұлттық референдумда қабылданады. Әзірге Конституциялық комиссия халықтан келіп түскен ұсыныстарды жан жақты талқылап, тиісті түзетулер әзірлейді.

Комиссия мүшелері түзетулердің аса көптігін ескере отырып, ортақ пайымға келді. «Ата Заңға жекелеген өзгеріс енгізу жеткіліксіз, қазіргі жағдайда жаңа Конституция қабылдаған жөн» деген байлам жасады. Қазірдің өзінде бір нәрсені күмәнсіз айтуға болады: жұртшылық назарына мүлде жаңа құжат ұсынылып отыр. Бұл құжат мемлекетіміз дамудың даңғыл жолына түскенін, яғни сапалық тұрғыдан жаңа деңгейге көтерілгенін көрсетеді.