Оңтүстікте бәйшешек гүлдеді

Еліміздің өзге өңірлерінде қыс әлі қытымыр мінезін танытып жатса да, Оңтүстікте көктемнің алғашқы жаршысы – нәзік бәйшешек бүр жарды. Биыл ақпан кірмей-ақ қар еріп, күннің жылы шуағы гүлдің ерте ашылуына ықпал етті. Қызыл кітапқа енгізілген сирек өскін Шымкенттің іргесіндегі елді мекендерде жайқалып гүлдеді. Сондай-ақ қаладан оңтүстікке қарай бағыт алатын күре жол бойы да алғашқы көктем гүлдерімен құлпыра бастады.

Шәкір Сатанұлы, Шымкент тұрғыны:

Бәйшешек биыл ерте шықты. Кеше, алдыңғы күндері жаңбыр жауып еді. Кеше күн қатты ысып еді, мінекей бәйшешек бұрқ етіп, қозықұйрыққа ұқсап шыға келді. Бұл күн екі-үш күн жылынса, бұл о-о бір қарысқа дейін көтеріліп кетеді.