Сыбайлас жемқорлықты қабылдау деңгейі төмендеді

Халық арасында сыбайлас жемқорлыққа төзбеушілік артып келеді. «Қоғамдық пікір» институты жүргізген әлеуметтік сауалнама нәтижесі, жемқорлықты қабылдау деңгейі өткен жылмен салыстырғанда 32,9%-дан 31,9%-ға дейін төмендегенін көрсеткен. Бұл туралы Мемлекеттік қызмет істері агенттігінде өткен жиында айтылды. «Адалдық идеологиясын және сыбайлас жемқорлыққа қарсы мәдениетті ілгерілетудің жаңа тәсілдері» атты іс-шараның алғашқы отырысында тараптар ашық пікір білдіріп, нақты ұсыныстарын ортаға салды. Жемқорлықсыз қоғам құру - мектеп ортасынан басталып, отбасында да дәріптелуі керек дейді жиынға қатысушылар.
Дархан Жазықбаев, ҚР Мемлекеттік қызмет істері агенттігінің төрағасы:

Мемлекеттік қызмет істер агенттігі қазіргі таңда сыбайлас жемқорлыққа қарсы мәдениетті қалыптастыру керек, ағартушылық жұмыстармен айналысуы керек деп біздің алдымызға негізгі мақсаттар қойылған. Сыбайлас жемқорлыққа қарсы күрес деген бұл тек қана мемлекеттік қызметшілерге қатысты емес. Мемлекеттік қызметшілер де бұл қоғамның өкілі. Бұл- әр Қазақстан азаматының қатысы бар, сондықтан біз бұл бағытта тек бір жолда емес, жан-жақты, әр сала бойынша жұмыстар жүргізуіміз керек.