Жаңа Конституция жобасы – қоғамның әділеттілік пен жаңаруға деген сұранысына нақты жауап

Қазақстан бүгінде маңызды тарихи кезеңнен өтуде. Конституциялық реформа жөніндегі комиссияның кезекті отырысында Премьер-министрдің орынбасары – Мәдениет және ақпарат министрі Аида Балаева осылай деді. Конституция – жүргізіліп жатқан жаңғырудың басты кепілі. Құжат сарапшылар тарапынан жан-жақты талқыланып, кейін қоғамдық бағалауға ұсынылады. Министр жаңа Конституция жобасы қоғамның әділеттілік пен жаңаруға деген сұранысына нақты жауап екенін айтты. 1995 жылғы Ата заң енді қалыптасып жатқан елдің құжаты болса, жаңа Конституция  толық қалыптасып жетілген елдің бас құжаты болмақ.

Аида Балаева, ҚР Премьер-министрінің орынбасары – Мәдениет және ақпарат министрі:

Осы кезеңде еліміз тарихи кезеңді бастан кешуде. Мемлекет басшысының бірнеше жыл бұрын әділдік пен парасаттыққа, заң мен тәртіпке сүйеніп бастаған ауқымды реформалары өзінің ең жоғары құқықтық мәртебесін алып, жаңғырудың жаңа белесіне аяқ басты.