Қазақстанда Нипах вирусын жұқтырғандар жоқ

Қазақстанда Нипах вирусын жұқтыру және оны ел аумағына әкелу жағдайлары тіркелген жоқ. Эпидемиологиялық ахуал тұрақты, жағдай толық бақылауда. Бұл туралы Денсаулық сақтау министрлігі мәлімдеді. Үндістаннан таралып жатқан қауіпті вирусқа байланысты мемлекеттік шекарада санитариялық-карантиндік бақылау күшейтілді. Мамандардың айтуынша, вирус жұқтырған адамдарда дене қызуы көтеріліп, жөтел пайда болады, сондай-ақ қатты бас ауруы байқалуы мүмкін. Денсаулық сақтау саласының өкілдері эндемиялық елдерден келген азаматтарға қандай да бір ауру белгілері сезілсе, дереу дәрігерге қаралуға кеңес берді. Ал инфекцияның алдын алу үшін жеке гигиена талаптарын сақтау, жарқанаттар мен доңыз сияқты жануарларға жоламаған жөн, дейді мамандар.