Қазақстандық футболшылардың сапына әлемдегі үздік ойыншылар қосылды

Қазақстандық футболшылардың сапына әлемдегі үздік ойыншылар қосылды
Әлем футболының жұлдызы Виктор Мозес, жаңа маусымда Қазақстан Премьер-лигасында ойнайды. 35 жастағы нигериялық аяқдопшы бүгін қызылордалық «Қайсар» футбол клубының сапын толықтырды.
Күннің суығына қарамастан «Қайсар арена» стадионына 3 мыңға жуық жанкүйер жиналды. Фанаттар Виктор Мозесті ерекше ықыласпен қарсы алды. Сырдың командасында бұрын-соңды мұндай әлемдік деңгейдегі футболшы болмаған. Нигериялық жартылай қорғаушы Ағылшын Премьер-лигасында 200-ден аса ойын өткізіп, «Челси» клубымен бір мәрте чемпион болған. Сондай-ақ, ол Еуропа лигасының екі мәрте жеңімпазы. Ал Нигерия ұлттық құрамасымен Афирка Кубогын ұтқан. Виктор Мозес, «Қайсар» футбол клубымен бір жылдық келісім-шартқа қол қойды.
Виктор Мозес, «Қайсар» ФК ойыншысы:

«Қайсар» командасына келгеніме қуаныштымын. Ең бірінші кезекте, клуб басшылығының алдына қойған мақсат-жоспары ұнады. Қаланың заманауи жаңа стадионы бар. Енді балалар академиясы салынбақ. Бұл өте керемет бастама. Алдағы маусымда алаңдағы ойыныммен жанкүйерлердің сенімін ақтап, «Қайсарды» жоғары жетістіктерге жетелеуге бар-күш жігерімді саламын.

Сондай-ақ, «Ақтөбе» футбол клубы да, қысқы трансферлік маусымда португалдық футболшы Луиш Наниді өз қатарына қосты. Әйгілі Криштиану Роналдудың отандасы ағылшын премьер-лигасының төрт дүркін чемпионы, «Манчестер Юнайтед» сапында Чемпиондар лигасын жеңген. Енді 39-жастағы Нани жаңа маусымда ақтөбелік команданың намысын қорғайды.