Оралда медицина қызметкерін ұрған күдікті қамалды

Оралда мейіргерді соққыға жыққан тұрғынға қатысты қылмыстық іс қозғалды.

Оқиға таңғы сағат 04:30 шамасында қалалық көпбейінді ауруханада болған. Өткір панкреатит диагнозымен жедел жәрдем арқылы ауруханаға жеткізілген науқас медициналық қызметкерге тап берген. Әуелі одан медбике жеке мәліметтерін сұраған кезде қарсылық білдіріп, дөрекі сөйлеген. Сол кезде ескерту жасаған мейіргердің жағасына жармасып, ұрып жіберген. Полиция хабарлама түскен бойда оқиға орнына барып, азаматты ұстаған. Қазір бұзақылық бабымен қылмыстық іс қозғалып, тергеу жүріп жатыр.

Диас Жайлаубайұлы, қалалық көпбейінді аурухана директорының орынбасары:

Науқас біздің медициналық қызметкерлерге әдепсіздік танытып, дөрекі сөз сөйлеп, қол көтерген болатын. Кейіннен науқасты хирург дәрігерлер қарап, барлық зерттеу жүргізіп, алғашқы ем көрсетіп, амбулаториялық емге, яғни үйге жіберген болатын. Кейін медициналық қызметкерлер өтініш жазып, полиция департаментіне жүгінді.