Ақтөбеде сотталғандар босап шықты

Ақтөбе облыстық сот алқасы мектеп оқушысының өліміне кінәлі деп танылғандарға кесілген жазаны өзгертті. Сотталғандар бостандыққа шықты. 2024-ші жылдың қыркүйегінде Темір ауданында 14 жастағы Нұржан Сыдықты жоғары сынып оқушылары ұрып-соққан. Салдарынан ол оқиға орнында жан тапсырды. Айыпталушылар қатарында 10-шы, 11-ші сыныпта оқитын 6 жасөспірім болды. Бұл іске қатысты сот үкімі 2025-ші жылдың қазан айында жарияланды. Айыпталушылардың үшеуіне 1 жылға бас бостандығын шектеу жазасы тағайындалды. Ал қалған үшеуі 6 жыл 8 айға бас бостандықтарынан айрылды. Дегенмен екі тарап та үкімге шағым түсірді. Облыстық сот кінәлі деп танылғандарға кесілген жазаны өзгертті.

Жансая Таирова, облыстық соттың баспасөз хатшысы:

Сотталғандардың кәмелетке толмағандығын, кінәсін мойындағанын, іс-әрекеттерге өкінгендігін, жәбірленушімен медиациялық келісім жасалғандығын және сотталғандардың жазасын жеңілдетуді сұраған жәбірленушінің өтініш жасағанын ескере отырып, сот алқасы шартты түрде жаза тағайындау туралы шешім қабылдады. Үкімнің қалған бөлігі өзгеріссіз қалдырылды.