ШҚО-дағы боран соңы аязға ұласады

Қайырлы күн! Иә, Айнұр, «Қазгидромет» орталығы шығыста әуелі қар жауып боран соғатынын бірнеше тәулік бұрын хабарлаған. Қазір Өскеменнің өзінде қарлы боран ұйтқып соғып тұр. Бүгін таңертең аймақтағы автокөлік жолдары бірінен соң бірі жабылды. Әуелі Өскемен – Семей аралығы одан соң Өскемен – Талдықорған – Алматы және Өскемен – Алтай – Қатон Қарағай бағыттарына шектеу қойылды. Бұл республикалық жолдар. Ал облыстық маңыздағы Шемонайха қаласы мен Сексисовка ауылының арасы да жабық тұр. Төтенше жағдайлар қызметі өңірдегі жолдардың жағдайы туралы ақпаратты және күн етегі жабылғанша халыққа алыс жолға шықпау туралы ескертуді сәт сайын жіберіп жатыр. Ал ауа райын болжау орталығы кешке қарай боран басылатынын хабарлады. Есесіне сақылдаған сары аяз болады. Тіпті аптаның соңына қарай түнде  -37-39 ал күндіз 33-35 градусқа дейін аяз болуы мүмкін.