Шымкентте заңсыз мұнай тасымалының жолы кесілді

Шымкентте мұнай өнімдерін ұрлау схемасы әшкере болды. Полиция жанар-жағармайды заңсыз тасымалдап, сақтап және сатумен айналысқан қылмыстық топты ұстады. Тергеу дерегінше, қылмыстық схемаға мұнай өңдеу зауытымен қоян-қолтық жұмыс істеген кәсіпорындардың қызметкерлері тартылған. Ұрланған отын бірнеше арнайы базада сақталып, заңсыз сатылған. Көлеңкелі қаржы айналымы 1 миллиард теңгеден асады. Тінту кезінде 17 тоннадан астам жанар-жағармай, қомақты ақша, отын айдау құралдары мен автоцистерналар тәркіленді.
Қуандық Алпыс, ІІМ Ұйымдасқан қылмысқа қарсы күрес департаментінің өкілі:

Барлық күдікті ұсталып, аса ірі көлемде ұрлық фактісі бойынша тергеу жүргізіліп жатыр. Қылмыстық іс аясында Шымкент мұнай өңдеу зауыты қызметкерлерінің қылмысқа, оның ішінде контрабандаға қатысы бар-жоғы тексеріліп жатыр. Бұл бағыттағы жұмыс жалғасады.