АҚШ Нигерия аумағында әскери соққы жасады

АҚШ қарулы күштері Нигерия аумағында әскери соққы жасады. Бұл туралы Дональд Трамп Truth Social әлеуметтік желідегі парақшасында жазды. Оның айтуынша, операция Нигерияның солтүстік-батысындағы ДАИШ террористік ұйымының нысандарына қарсы бағытталған. Мұндай шешімге лаңкестік топтың елдегі христиан қауымына қарсы жаппай қырғын ұйымдастыруы себеп. Алайда Трамп әскери операцияның қалай жүргізілгені мен оның нақты нәтижелері туралы егжей-тегжейлі мәлімет бермеді. Дегенмен, бұған дейін ескерту жасағанын және терроризмге қатаң әрі аяусыз жауап беретінін атап өтті. Ал Пентагон басшысы Пит Хэгсет өз мәлімдемесінде операцияны жүзеге асыруға қолдау көрсеткені үшін Нигерия үкіметіне алғыс білдірді.