12 адамның өмірін қиған жол апаты: Сот процесі айыпталушысыз өтеді

Ақтөбе облысында 12 адамның өмірін қиған жол апатына қатысты сот процесі айыпталушысыз өтеді. Өйткені оқиға кезінде екі көліктің жүргізушісі де қаза тапқан еді.

Еске салсақ, сұмдық жол апаты қазан айының соңында, «Самара-Шымкент» тас жолында болды. «Даф» маркалы жүк көлігі қарсы бағытқа шығып кетіп, шағын жолаушылар автобусына соққан. Соның салдарынан он жолаушы мен екі жүргізуші сол жерде жан тапсырды. Алты адам ауруханаға жеткізілді. Қаза тапқандардың екеуі бала. Оқиғаға қатысты қылмыстық кодекстің «Абайсызда адам өліміне әкеп соққан жол қозғалысы ережелерін бұзу» бабы бойынша іс қозғалған еді. Алдын ала сот тыңдауы 29-ыншы желтоқсанда өтеді.