Besqaru зауыты жылына 200 бронды техника құрастырады

Мемлекет басшысы ақпан айында ғана ашылған шынжыр табанды және дөңгелекті бронды машиналар шығаратын Besqaru зауытына барды. Қасым-Жомарт Тоқаев мұндағы технологиялық процестермен және зауыттың өндірістік мүмкіндіктерімен танысты. Компания жылына 200 бронды техника құрастыруға қауқарлы. Олардың қатарында суды кешіп өте алатын және бронды машиналар, сондай-ақ Tulpar шынжыр табанды техникасы бар. Жобаның жалпы құны 13,5 миллиард теңге. Бүгінде кәсіпорын 134 адамды жұмыспен қамтып отыр. Компания өз өнімін Қорғаныс министрлігі мен басқа да күштік құрылымдарға арнап шығарады. Мемлекет басшысы зауыт қызметкерлерімен әңгімелесіп, олардың еңбегі өнімді болуына тілектестік білдірді.