Алматы облысы Іле ауданының бұрынғы әкімі Бағдат Қарасаевқа қатысты сот үкімі шықты

Қызметтік өкілеттілігін асыра пайдаланды деп күдікке алынған Алматы облысы Іле ауданының бұрынғы әкімі Бағдат Қарасаевқа сот үкімі шықты. Ол қызметін заңсыз пайдаланып, қатты тұрмыстық қалдықтар полигонын өзіне жақын компанияға берді деп айыпталған. Сот істі Қылмыстық кодекстің жеті бабы бойынша қарады. Алайда бір эпизод бойынша кінәсіз, ал басқа баптар бойынша кінәлі деп таныды. Сот үкімімен Бағдат Қарасаев 3 жыл 3 айға бас бостандығынан айырылды. Ол жазасын қылмыстық-атқару жүйесінің ең төменгі қауіпсіздік мекемесінде өтейді. Сондай-ақ сот Бағдат Қарасаевты «Парасат» және «Құрмет» ордендерінен айыру туралы Президентке ұсыныс енгізу жөнінде қаулы қабылдады.