Талды ауылының жолы күрделі жөндеуді қажет етеді

Қарағанды облысы Қарқаралы ауданына қарасты Талды ауылының жолы күрделі жөндеуді қажет етеді. 5 жыл бұрын мұнда бюджеттен 800 миллион теңге бөлініп, асфальт төселген. Алайда оның сапасы сын көтермеді.
Бүгінде Талды ауылына қарасты 4 елді мекенді қосқанда 2 мыңдай тұрғын бар. Барлығы қалаға жету үшін осы 45 шақырым жолды пайдаланады. Осыдан 5 жыл бұрын салынған жолдың бір жылда тас-талқаны шыққан. Ұлттық сапа орталығының мәліметінше, асфальт асты қабаты нығыздалмай, суық күйінде салынған. Сол үшін жергілікті билік мердігерді сотқа берген.

Ауылдың кісілеріне обал ғой. Жол тесік-тесік. Топырақпен бітейді. Сапасы да жоқ.
Жолымыз быт-шыт. Неше жыл болды! Қаншама көлік кетті.

Ал 2024 жылы жұмыс қайта басталып, биыл аяқталуы тиіс еді. Жобаға 500 миллион теңге қаржы да қарастырылған. Бірақ бұл жолы да техникалық талап орындалмай жұмыс тұралап тұр. Жобалық сметалық құжат бойынша енді мұнда қос қабатты асфальт төселмек. Жұмыс келер жылы қайта жаңданып, кезең-кезеңімен жүзеге асады. Әзірге ауыр жүк көліктеріне қатынауға шектеу қойылды.
Абылай Ысқақов, аудандық ТҮКШ басқармасы басшысының міндетін атқарушы:

Келесі жылы ауа райы жақсарғаннан кейін жұмыстарды бастаймыз. Облыстағы басшылыққа ескерттік. Олар қаражатты бюджеттік жоспарлау кезінде қарастыратынын айтты.