Павлодарда «Тәуелсіздік: Тарих. Тағылым. Болашақ» конференциясы өтті

Тәуелсіздігіміздің тұғырлы болуы бүгінгі жас ұрпаққа тікелей байланысты. Павлодардағы Марғұлан университетінде өткен «Тәуелсіздік: Тарих. Тағылым. Болашақ» атты ғылыми-практикалық конференцияға қатысушылардың пікірі осындай. Шара барысында еліміз егемендігін алғаннан бергі жылдардағы жетістіктерге талдау жасалды. Тәуелсіздік құрдастарының ел дамуына қосқан үлесі жайлы айтылды. Болашаққа үлгі болар іске ұйытқы болып жүрген жастарға арнайы марапат табыс етілді. Тәуелсіздік жаршысына айналған Желтоқсан оқиғасының қанды алаңында болған тікелей куәгерлерге биыл шыққан «Желтоқсан қаһармандары» медалі тапсырылды.

Ырысгүл Шақаман, филология ғылымдарының кандидаты, Желтоқсан қаһарманы:

Сол кездегі 86 жылғы күрескен жастардың бағасы берілді. Оларды қазір ресми түрде бағалау жүріп жатыр. Олардың атына қазір арнайы конференциялар өтіп жатыр. Бұл біз үшін өте қуанышты жағдай. Әсіресе қуанатынымыз - Үкімет басшыларының бұған нақты оң көзқараспен баға беріп жатқандығы.