Ақтөбе облысында бірнеше бағыттағы жолдар жабылды

Облысты екі тәулік бойы қарлы боран соқты. Кеше кешкілік үш республикалық және төрт облыстық маңыздағы жолдар жабылды. Алыс елді мекендерден келе жатып, сапарын жалғастыра алмаған жүргізушілер мен жолаушылар кемпингтерге және жақын елді мекендердегі мешіттерге орналастырылды. Олар жолдар ашылғаннан кейін, бүгін таңда сапарларын жалғастырды. Дегенмен, бүгін түске дейін бірінші-сегізінші сынып оқушылары қашықтан оқып жатыр. Синоптиктердің болжамынша, бүгін де өңірде жаяу бұрқасын соғады. Ақ түтек боран Ақмола, Абай, Қарағанды, Жамбыл және Павлодар облыстарының тұрғындарын да әуреге салды. Бұл өңірлерде де бірнеше бағыттағы жолдар жабылған.