Қостанай мен Қарағанды облысында жол жабылды

Қостанай облысында қолайсыз ауа райына байланысты кеше 5 жол учаскесі жабылды. Әулиекөл – Жалдама бағытында көктайғақта жүре алмай, 16 көлік тұрып қалған. Қазір өңірдегі тілшіміз Мәдина Нағашыбай бізбен тікелей байланыста. Мәдина, қазір жағдай қалай?

Мәдина Нағашыбай, тілші:

Әулиекөл – Жалдама бағыты қазір жабық. Көліктің бәрі кері қайтарылды. Сонымен қатар өңірде тағы облыстық 3 жол жабылды. Бейімбет Майлин аудынының Әйет ауылының маңында 4 жүк көлігі көктайғақтан өте алмай, біраз уақыт бөгеліп қалған. Жергілікті әкімдік тиісті көмек көрсетіп жатыр. Жол полициясы бақылауды күшейтті. Синоптиктер алдағы күндер аяз көтеріліп, боран болады деп ескертеді. Ауа температурасы – 25-28 градусқа  дейін төмендейді. Сондықтан мамандар жолда барынша абай болып,  ара қашықтықты сақтауға кеңес береді.

- Қарағанды облысындағы жағдайды әріптесім Жандос Бақытұлы баяндасын. Жандос?

Жандос Бақытұлы, тілші:

Иә, Мәдина! Арқаға қыс қарсыз келді. Таңда жауған ақ ұлпа түске дейін, түсте жауғаны кешке дейін еріп кетіп жатыр. Тұрғындар да мұндай ауа-райына көз үйрете алмай жатқанын айтуда. Еріген қар көлік қозғалысына да біршама кедергісін келтіруде. Бірнеше күн бойы республикалық маңызы бар Астана – Қарағанды тас жолында ауыр жүк көліктерінің қозғалысына шектеу қойылған. Бірақ қазір барлық бағытта қозғалыс ашық. Алайда сниоптиктердің болжауынша, ертең ауа температурасы -20 градусқа түсіп, көктайғақ болуы мүмкін. Қар да қалың түседі деп хабарланды. Сондықтан құтқарушылар көлік жүргізушілеріне барынша сақ болып, жол ережелерін қатаң сақтауға кеңес береді.