Ташкенттің ауа сапасы нашарлады

Көршілес Өзбекстанда экологиялық ахуал әлі де күрделі. Атмосферада зиянды заттар мен улы газдардың шектен тыс көбеюіне байланысты тыныс жолдарының түрлі сырқаттары өршуі мүмкін.
Билік осылай деп дабыл қағуда. Денсаулық сақтау министрлігіне ауруханалардың науқастар ағынына сақадай сай болуын қамтамасыз ету тапсырылды. Сондай-ақ ведомство өкілдері тұрғындарға ресми хабарлама жолдады. Онда ашық ауада және адам көп жиналатын жерлерде қорғаныс маскаларын тағу қажеттігі айтылған. Осы тұста бетпердеге сұраныс та күрт артып отыр. Ал дәріханаларда респираторлық маскалар тапшы.
Хонзода Носирова, дәрігер - аллерголог:

Ауаның ластануы мен жедел респираторлық вирустық инфекциялардың күшеюіне байланысты тұрғындардың сыртқа мейлінше көп шықпауы қажеттігін ескертеміз. Егер тамақтың қышуы, көзден жас ағуы мен мұрын бітелуі секілді белгілер байқалса жедел түрде дәрігерге көрінген абзал.