Футболдан ӘЧ жеребе тарту рәсімі өтеді

Бүгін келер жылы өтетін футболдан әлем чемпионатының жеребе тарту рәсімі өтеді. Вашингтонда болатын спорттық шараны «Qazaqstan» Ұлттық телеарнасы сағат 22:00-де тікелей эфирде көрсетеді. Ала доп бәсекесінде 48 елдің командасы бақ сынайды. Біріншілік жаңа ережемен өтеді. Жеребе бойынша 4 командадан тұратын 12 топ жасақталады. Әр топтан бірінші және екінші орын алған командалар автоматты түрде плей-оффқа жолдама алады. Қалған 8 жолдама үшінші орын алған және ең көп ұпай жинаған ел құрамаларына бұйырады. Ойындар Канада, АҚШ және Мексиканың 16 қаласында өтеді. Чемпионат 11 маусымда басталып, 19 шілдеде аяқталады, яғни турнир бір жарым айға созылады. Матчтарды «Qazaqstan» және «Qazsport» телеарнасы тікелей эфирде көрсетеді.