Қазақстан контингенті Голан жоталарын минадан тазалауда

БҰҰ миссиясы құрамындағы Қазақстан контингентінің инженерлік-саперлік тобы Голан жоталарын қауіпті заттардан тазалау жұмыстарын жүргізіп жатыр. Бітімгерлер көп мөлшердегі жарылғыштар мен қару қалдықтарын тапқан. Тек биыл сегіз айда 32 жедел тапсырманы орындап, мыңнан астам қауіпті зат, оның ішінде 23 қолдан жасалған құрылғыны жойған. Бейбіт тұрғындарға қатер әкелетін жарылғыштар Сирия аумағындағы қарулы қақтығыстардың салдарынан пайда болған. Саперлер оларды көбіне елді мекендерге жақын жерлерден анықтаған. Сондықтан қазақстандық контингенттің кәсіби жұмысы нәтижесінде бейбіт тұрғындарға төнетін қауіп деңгейі айтарлықтай төмендеп отыр.