Өзбекстанда аң-құсты заңсыз тасымалдау азаяр емес

Өзбекстандағы кеден бекеттерінде жабайы жануарлар мен өсімдіктерді заңсыз тасымалдау фактілері тыйылмай тұр. Соңғы 3 жылда 40-қа жуық  осындай әрекет анықталған.

Бұлардың біразы қазақ-өзбек шекарасындағы бекеттерде орын алды. Кеден комитетінің хабарлауынша, 600-ге тарта жабайы аңдар мен 350-ден астам құс тәркіленген. Барлығы да Қызыл кітапқа енгізілген, сирек кездесетін хайуанаттар. Мұнан бөлек, жануарлардың мүйізі мен терісін заңсыз алып өту әрекеті анықталды. Тексеру кезінде жан-жануарлармен қатар 8 мыңға тарта өсімдік түрлерін,10 мыңға жуық ұсақ жәндіктерді тасымалдау әрекеті де әшкере болды. Кеден органдары оларды бірден зообақтарға тапсырады.

Аминжон Махмудов, Өзбекстан Республикасы кеден комитетінің бас инспекторы:

Адамдар көбіне жабайы жануарларды қол жүгіне жасырып алып өтуге әрекеттенеді. Кей жағдайда ұшақтардың жүк қоймасына немесе жеміс-жидектің арасына тығып өткізбек болады. Өкініштісі сол, қатыгездікпен қарау салдарынан жолда өлген жануарлар да бар.